Verbos galegos en Internet
A función primordial deste programa é dar a coñecer a todo o mundo -nunca mellor
dito- a través de Internet a conxugación dos verbos galegos. O texto de referencia é
"Os Verbos galegos" publicado pola Dirección Xeral de Política Lingüística
da Xunta de Galicia en 1992.
Apartados do programa:
Conxugar: tecleado o infinitivo no navegador e pulsado o botón
enviar o programa devolve a conxugación completa do verbo. Ata aquí temos algúns
exemplos, non moitos, comparables en Internet:
Verbos españoles
Conxugación de verbos
franceses
Conxugación
Este programa, ademais, e a diferencia dos anteriores, ten as seguintes
posibilidades: (os exemplos non funcionan aquí porque o noso servidor é
UNIX e non Windows NT, póñense a título de mostra)
Buscar: dada a forma verbal o programa devolve o tempo, número e
persoa dos verbos que teñan esa forma.
Modelos de conxugación: facilita unha lista de verbos que
constitúen os modelos de conxugación. Elixido un, conxugarao.
Clasificación dos verbos: dada a lista de modelos de verbos
anterior o programa facilita os verbos que se conxugan do mesmo xeito, seguindo o mesmo
modelo.
Base de datos de verbos: permite buscar na base de datos de 6500
verbos galegos os que teñan unha determinada característica. Así con *aer devolverá
tódolos verbos rematados en aer, e con a???r tódolos verbos de cinco letras que comezan
por a.
Exercicios. Unha vez escollido o verbo sobre o que vai facer exercicios, terá que
relacionar formas conxugadas con tempos verbais. De dúas maneiras: tendo que escolle-lo tempo dunha forma verbal ou ben escribindo unha conxugación
concreta dun verbo elixido.No primeiro caso ten un botón de comprobar se o tempo verbal
escollido é o correcto e no segundo ademais da opción de comprobar se a resposta é
correcta, pode sabela directamente pulsando o botón "solución" para que non
desespere se non atina con ela. Nos dous casos o programa xera unha páxina HTML con
programas Javascript distintos para cada pregunta feita ó programa (que actúan de
controis para os botóns).
En tódolos casos das opcións anteriores que así o precisen, poderá escoller cun botón
de radio a nomenclatura dos tempos verbais seguindo as dúas que en diversas edicións
utiliza as "Normas ortográficas e morfolóxicas do idioma galego" do ILG e a
Real Academia.
Conxugación hipotética: aínda que non teña o verbo na base de datos, conxugarao
seguindo as regras xerais de conxugación do galego. Así, aínda que non ten rexistrado
"desmoer" fará a conxugación. Que será a adecuada na maioría dos casos.
Se ten un servidor Windows NT con IIS en Internet e quere selo primeiro en poñe-lo programa, contacte connosco.
Nota sobre a utilización do programa:
Ademais de poder usalo en Internet, Verbos Galegos en Internet é un
programa para utilizar nunha intranet (dun colexio, instituto ou universidade) no que o
servidor sexa un ordenador Windows 95 con Servidor Persoal de Web de Microsoft ou Windows
NT con servidor de Web Internet Information Server. Ou, probablemente, con calquera
servidor de Web en Windows que funcione co estándar ISAPI de Microsoft. Tamén pode usalo
nun só ordenador se ten instalado algún dos servidores citados anteriormente. O Servidor
persoal de Web pódeo baixar de Internet . Tamén vén
incluído co programa editor de páxinas Web FrontPage. Internet Information Server está
incluído no paquete de Windows NT 4.0 ou ben pode baixalo gratuitamente
de Internet.
Que necesita:
Para usalo necesita (nunha intranet ou nun ordenador local) un servidor de Web e un
navegador. Desde Internet, o usuario só necesita un navegador. Para os exercicios,
preferiblemente as versións 3.0 ou superiores de Internet Explorer ou Netscape que
soportan mellor o Javascript.